Negoshi chikitonan ta prepara pa adapta?

Autor: Mauro de Koning, SME Support

Editor: Lay Hing de Kort-Yee, Chief Purpose Officer

Luna di Maart ta yegando su final y Covid-19 tin paisnan y economianan rond mundo puntrando nan mes; Kico ta warda nos den futuro?


Mientras companianan ta wak na nan gobierno pa ayudo, mi ta puntra mi mes kico tur e companianan chikito y mediano ta bay hasi?, paso e pensamento usual ta cu mayoria di e companianan grandi lo por sobrevivi, y kico lo pasa cu e negoshinan chikito? Mundo ta draai asina lihe y negoshinan ta bay riba mesun ritmo cu ta bira hopi dificil pa para keto un rato y evalua di berdad con tur cos ta bayendo.


Awor aki e Covid-19 a duna tur negoshi, primordialmente esunnan chikito y mediano e chens pa para keto y evalua si e manera cu nan ta operando e delaster añanan ta e miho manera pa sigui den futuro.


Niun hende por pronostica si ta 3, 6, of 12 luna e pandemia aki lo dura. A cuminsa pensa riba un “Plan B”? Kico nos mision y vision pa e compania ta, considerando e futuro? E compania su “business model” mester cambia of wordo adapta? Aki nos ta pone enfasis riba tres tema esencial:


Inovacion

Un articulo di abcNews ta splica con diferente companianan a busca otro manera pa juda y crea entrada. Por ehempel; companianan cu ta duna servicio a cuminsa traha fe cas y uza “online platforms” manera ZOOM pa yuda nan clientenan. Restaurantnan a cuminsa servicio di pidi cuminda online of via medianan social y entrega na cas pa clientenan.

Segun un encuesta “State of Innovation”, cu a wordo hasi dor di Banco Central di Aruba na aña 2017 ta indica cu 78% di negoshinan tawata competi a base di eficiencia y prijs, mientras 22% tawata competi a base di inovacion y calidad halto. Awe nos por mira cu inovacion y calidad ta hayando mas su atencion.



Source: “State of Innovation” Survey, Centrale Bank van Aruba, 2017


Na 2017 caba, un 80% di negoshinan a indica cu inovacion ta sumamente importante pa nan negoshi. Mientras menos cu 30% di negoshinan chikito a indica cu nan ta experimenta cu ideanan nobo, y inovacion.



Source: “State of Innovation” Survey, Centrale Bank van Aruba, 2017


Pa lo cual ta pago, negoshinan a indica na 2018 cu 50% di consumidornan ta paga cu carchi, 27% cu cash y 23% tawata hasi uso di tur dos. Cu e situacion di COVID-19, nos ta wak cu mas negoshi ta cuminsa pidi pa paga cu ATM. Interesante lo ta pa midi con negoshinan a desaroya pa lo cual ta trata inovacion despues di COVID-19.


“Scrutinacion di serca lo demonstra cu den mayoria ‘situacion di crisis’, tin oportunidadnan pa avansa of keda unda bo ta” – Maxwell Maltz


Responsabilidad social den comunicacion

Tambe nos tin cu wak con negoshinan lo adapta nan manera di comunica. “The Next Web”, un website basa na Hulanda cu ta un plataforma pa tur cos cu ta tecnologia y startups, ta inidica cu companianan en general tin cu adapta nan manera di jega na nan clientenan. Den e momento nan dificil nos dilanti, empatia y relevancia lo keda e esensia principal den tur strategia di PR y marketing pa tur categoria di compania. Companianan tin cu studia y detecta ken nan audiencia ta pa por adapta nan contenido adecuadamente. No tur articulo of post mester tin e palabra “Covid-19” den dje, pero si por ofrece informacion na kico bo audiencia lo kier tende, sea cuminda, naturalesa, tecnologia of politica.


Operacion

E pandemia a obliga hopi compania evalua nan proceso di operacion pa hasi esaki mas eficiente, aunke esaki lo por a wordo hasi mas trempan. E tempo y velocidad cu nos economia ta core ta hasie dificil pa haña e oportunidad pa hasi esaki. Ta importante pa hasi un inventarisacion di e proceso di e compania y pensa caminda cosnan por wordo hasi diferente y eficiente.

Tin lus na final di e tunnel

Ta dificil pa tur hende na e momento nan aki. Pero semper tin lus na final di e tunnel. Y ta e momentonan aki ta pone nos como ser humano saca e mihor for di nos mes, nos compania y nos vision pa asina por evalua y tuma e mihor desiciononnan pa por brinda tur hende e producto y servicio cu nan mester pa futuro.



Cornerstone Economics ta ofrece guiansa 1:1 na negoshinan chikito y startups pa medio di nos servicio Guiansa StartUP. Pa book bo session por hasi esaki via: https://www.c-economics.com/startupbookonline of por tuma contacto cu Mauro de Koning na support@c-economics.com




341 views

Oranjestad, Aruba

(297) 5922265

info@c-economics.com

  • Facebook Social Icon
  • LinkedIn Social Icon

© 2018