Bintibinti; esaki ta nos aña!

Autor: Mauro de Koning, SME Support, BSc. in business administration

Imaginabo lanta un diamars mainta, full relaha y cla pa inicia bo rutina. Bo ta bai haci ehercicio, bebe un koffie of kisas simplemente sinta den bo cura un rato, contempla y duna danki pa otro dia.

Bo ta tuma un baño y ta pensa kico bo ta bai bisti awe. Diripiente bo ta sinti manera un  presion na bo schouder y lomba, bo ta sinti e tension te den bo cabes. Mientrastanto cu bo sa cu bo mester bay traha, bo ta identifica pensamentonan negativo pa cu esaki, pasobra realmente bo no tin mucho gana di bay traha.

E circumstancia aki, hopi ta experiencia tur dia. Unda e pregunta caridinal ta; kico ta realmente bo preocupacion? Kisas bo no gusta bo trabou? Kisas bo no ta gusta e ambiente den cual bo ta traha aden?  Nos tur ta pasando door di temponan cu nos no a premira cu consecuencianan sin precedente. Awor ta e momento pa desaroya nos liderazgo. Sinembargo, e tema di liderazgo mes ta den crisis pa basta aña caba. Prome cu e crisis pa consecuencia di COVID-19 a manifesta su mes, tabata tin diferente opinion for di diferente skina y perspectiva cu mundo tin mester di lidernan cu cierto capacidad y competencianan.

E revista Forbes tambe a dedica diferente articulo riba e tema di liderazgo. Recientemente, Glenn Llopis a publica un articulo tocante e crisis riba e tema di liderazgo den e revista aki. E articulo aki a hala mi atencion, pasobra mi a reconoce varios punto cu ta aplicabel tambe den nos mundo empresarial na Aruba. Es mas, e crisis ocasiona door di CODIV-19 a manera pone un “vergrootglas” riba e retonan aki cu nos tin na Aruba. Aruba ta un comunidad chikito y hopi conoce otro of sa ken ta haci kico. Kisas cada un di nos por tuma un rato pa puntra nos mes y evalua kico nos por siña di e crisis aki pa nos por ta mas exitoso mañan. E idea aki ta conta pa comercio en general y pa e sector publico tambe. Mi ta convenci cu, si cada un di nos tuma un momento di reflexion, nos por tin un influencia positivo riba otro y hunto colabora pa nos tur por ta exitoso. 

Ta un bon lider ta esencial den e era cu nos ta biba aden. Un posicion den un organisacion no necesariamente ta hasibo un (bon) lider. Loke ta rekeri pa bo ta un bon lider ta cuminsa na tin un vision y con bo ta comunica esaki na otro. Bo meta ta pa laga otro identifica nan mes na bo vision y ta compromete nan mes pa colabora pa haci e vision aki un realidad. E proposito, e manera cu un lider ta comunica cu otro, su escogencia di palabranan ta determina si e ta inspira esnan rond di dje y si e por crea un ambiente positivo den cual un persona ta sinti su mes comodo y ta contento di ta parti di e ekipo. Keremi, bo ta logra hopi si tur esnan rond di bo tin e sensacion cu nan ta parti di algo mas grandi; "un meta specifico" cu mester wordo realisa, na lugar di presenta na trabou solamente pa e necesidad di tin un entrada. 

E crisis cu nos tur ta aden a bati e bel pa nos puntra nos mes "PAKICO"? Pakico mi a cuminsa e negoshi aki? Pakico mi a dicidi di bin traha pa e compania aki? Pakico nos a dicidi di tuma e decisionnan aki? Na bienestar di ken? E palabra pakico of dicon, tin un peso hopi fuerte riba un hende of negoshi ora mester busca e rason (e pakico) cu nos ta haci loke nos ta haci.  Hopi ta kere cu e sector publico y sector priva tin metanan diferente. Esaki ta asina, pasobra na un banda nos a custumbra di wak ‘e supuesto bienestar general’ versus e crecemento di ganashi di empresanan como indicador di exito. Finalmente tur dos mester refleha crecemento di nos GDP. Ta na su luga pa pensa cu esaki ta un indicador di exito anticua? Crecemento di nos GDP ta duna un bon refleho di nos bienestar general? Tin diferente pais cu a cuminsa laga los di e pensamento aki, mi mes ta di opinion cu nos mester cuminsa enfoca riba e concepto di PROGRESO. Tur organisacion riba e dushi isla aki tin e reto awor pa pensa riba nan proposito, un cultura nobo, un cultura unda ta valora e ser humano den tur aspecto. Organisacionnan tin e tarea pa cuminsa na valora su empleadonan intrinsicamente. Esaki kiermen cu e empleado primeramente mester wordo motiva pa traha for di su curason.

E individuo mester sinti su mes automaticamente motiva pa colabora, pa duna tur di su mes pa logra metanan di progreso di tur esnan rond di dje. E individuo mester sinti cu e ta parti integral di e organisacion of empresa. Un encuesta di Bloom Leaders, efectua na aña 2018, a constata cu 79% di empleado nan ta kita for di trabou paso nan no ta wordo aprecia, mientras 63% di Millennials a indica cu nan ta sinti falta di oportunidadnan di desaroyo di liderazgo den nan area di trabou. 

Evidentemente, sector priva y publico mester cuminsa colabora pa asina crea un mihor balansa den e bienestar di nan asociadonan. Den e periodo nos dilanti ta esencial cu organisacionnan mester pone e mihor cu nan tin pa ofrece riba mesa pa por crea un ambiente nobo y refrescante, brindando cada ken e oportunidad pa ta contento y satisfecho. Un ambiente unda tur empleado por bisa cu nan ta orguyoso pa forma parti di e compania of departamento concerni.  Nos isla cu aproximadamente 113.000 cuidadano, tin e potencial pa ta e isla mas stabiel y innovativo den nos region. Pa logra esaki tur hende mester duna di nan banda pa crea valor pa nan mesun trabou. Meta di e articulo aki ta pa haci un yamado na tur esnan cu ta sinti nan mes lider pa cuminsa duna di nan parti pa crea un cultura empresarial nobo. Un yamado na nos lidernan pa simplemente cuminsa scucha nan empleadonan y mantene e liña di comunicacion transparente. Cu e confiansa renoba aki, nos ta bai wak un cambio drastico den nos economia.  Esaki ta nos aña, aña 2020 ta e aña pa pone e ser humano na prome lugar. Keremi, cada un di nos tin e deseo di sinti cu nos ta forma parti di algo mas grandi cu nos mes.

DISCLAIMER: Cornerstone Economics provides news and articles as a service to our readers. This article is a professional and informative article and is by no means associated with political discussions. Cornerstone Economics reserves the right to make any changes in time.

Cornerstone Economics is a purpose-built research-based consultancy firm focused on solving management challenges from an entrepreneurial and business perspective. We apply our business, analytical and creative skills to bring about solutions to public, private, and the social sector. With an entrepreneurial mindset, we provide commercial solutions to businesses, as well as social solutions to policy makers. We believe that to solve social challenges, we need to re-imagine the system and bring business and people together as one.